ROXAS CITY – Ginganyat sang Provincial Health Office (PHO) Capiz, ang mga ginikanan nga pabakunahan ang ila tagsa ka mga kabataan nga kababainhan partikular ang naga-edad 9 tubtob 14-anyos ang edad.
Sa interview sang Bombo Radyo kanday Mr. Julius Vicson Dela Cruz NIP Manager kag Mr. Ayr Altavas tagpamaba sang PHO Capiz, ila ginpahayag nga ila ginarekomendar nga magpabakuna sang HPV vaccine ang mga kabataan bangud samtang bata pa mas epektibo ini bangud ang preteens ang naga-produce sang mas madamo nga antibodies pagkatapos sang HPV vaccination kung ikumparar sa mas may edad na nga mga teenager.
Suno diri, agud mangin epektibo sang husto ang bakuna, kinahanglan nga magpabakuna na sang temprano antes mag-angkon sang sekswal nga aktibidad kag antes sila makakuha sang nasambit nga virus.
Mahibaluan nga ang human papillomavirus ukon HPV, isa ka virus nga may ikasarang nga maglaton sa isigkapareho nga mahimo makuha sa pagpakighilawas.
Kaangay sang mga papillomaviruse, ang HPV nagatuga lamang sang mga produktibo nga mga impeksiyon sa keratinocytes sang panit ukon mukos membrano.
Ginpakigbahin man sang mga ini ang importansya sang amu nga bakuna kung sa diin nagaprotekta batuk sa HPV infections nga mahimo magdala sang;
*Mouth and throat cancer ukon kanser sa bibig kag tutunlan
*Cervical cancer ukon kanser sa matris
*Vaginal and vulvar cancer ukon kanser sa kinatawo sang babaye kag vulva
*Penile cancer ukon kanser sa kinatawo sang lalaki
Nagahatag man ini sang proteksyon batuk sa mga impeksyon nga nagaresulta sang genital warts ukon kulugo sa may bahin sang kinatawo sang babaye kag lalaki.
Ang pagpabakuna batuk sa HPV tubtob 3 doses kung sa diin pagkatapos sang una nga dose, 1 tubtob 2 ka bulan antes liwat nga magpabakuna sang 2 dose kag ang katapusan makaligad ang anum ka bulan.
Panugyan sang mga ini nga magpadulong lamang sa ila talatapan agud mahatagan kag matudluan sang dugang nga ihibalo angut sa nasambit nga bakuna.
