ROXAS CITY – Ginahulat pa karon sang Provincial Health Office (PHO) ang resulta sang eksaminasyon sa specimen sample sang panibag-o nga tatlo ka mga Persons Under Investigation (PUIs) sa Capiz nga posible nakaangkon sang coronavirus disease ukon COVID-19 nga ginpadala sa Research Institute for Tropical Medicine (RITM).
Ini ang ginpahayag ni Provincial Health Officer Dr. Samuel Delfin sang mainterview sang Bombo Radyo.
Suno kay Delfin nga sang nakaligad nga adlaw sang Biyernes nila ginpadala ang nasambit nga mga sample specimen.
Sa karon suno sa iya yara sa estable nga kondisyon ang tatlo ka mga PUI’s nga naka-confine sa magkatuhay nga ospital sa siyudad kag padayon nga gina-quarantine.
Suno diri nga isa ka babaye nga Overseas Filipino Worker (OFW) gikan sa Hong Kong nga nagapang-edaron sang 45-anyos ang ikatatlo nga PUI nga nag-abot sa Pilipinas sang Pebrero 2.
Ginpahayag nga sadtong Pebrero 11 sang nagsuprehir ini sang ubo kag hilanat.
Samtang, ang ikaapat kag ikalima nga mga PUI nagapang-edaron sang 64-anyos kag 79-anyos nga lunsay mga lalaki nga retirees kag US citizen.
Nahibaluan nga nagbiya sila sa Amerika sang Enero 30 apang nagstop-over sang apat ka oras sa Tapei, Taiwan.
Nagsuprer sila pila ka mga sintomas sadtong Pebrero 5 tubtob 8 kag sang Pebrero 12, nagpaidalum sa pagbulong.
Matandaan nga una na nga napagkit sa Capiz ang duha ka mga PUI’s apang sa karon ang naka-discharged na matapos nga nag-negatibo sa coronavirus disease (COVID) 2019.
