ROXAS CITY – Liwat nga ginpahangop sang tagpamaba sang Capiz Provincial Health Office ang importansiya sang pagpaidalom sa home quarantine sang mga indibidwal nga gikan sa mga lugar nga infected ukon apektado sang coronavirus disease (COVID-19).
Ini ang kasunod sang mga reports nga may mga indibidwal sa gihapon nga makabig nga mga Persons Under Monitoring (PUM’s) nga padayon nga nagalagaw kag wala nagapaidalom sa self ukon home quarantine.
Ginpahayag ni Ayr Altavas, importante ang pag-quarantine sang isa ka persona agud malikawan nga may malatnan ini pananglitan nga positibo ini sa nasambit nga virus.
Gin-athag naman ni Altavas nga ang mga Persons Under Investigation (PUIs) amo ang mga indibidwal nga may travel history sa mga pungsod ukon lugar nga apektado sang amo nga balatian kag may yara sang mga sintomas kapareho sang hilanat, ubo kag sip-on.
Samtang ang mga Person Under Monitoring o (PUM) naman amo ang mga indibidwal nga may travel history man sa mga lugar nga apektado sang nasambit nga balatian apang wala nakitaan sang nasambit nga mga sintomas apang nagakadapat sa gihapon ini nga magpaidalom sa home quarantine.
Ginpahayag ni Altavas nga dapat 14 diyas ang pagpaidalom sa quarantine sang isa ka persona bangud sa 14-day incubation period sang kagaw nga may dala sang amo nga virus.
Suno kay Altavas nga may dako nga papel ang Barangay Health Emergency Response Team (BHERT) sa paghinyo sa mga (PUM’s) sa ila lugar nga magpaidalom sa home quarantine.
Ginpanindugan pa ni Altavas nga may nagakaigo nga penalidad nga mahimo atubangon ang sinuman nga indi magsunod sa quarantine protocols.
Sa karon suno kay Altavas, nagdangat na sa 3, 632 ang active PUM’s sa probinsiya kag padayon nga nagapaidalom sa 14-day home quarantine samtang 706 na ang na-terminate ukon natapos na ang ila nga quarantine period.
