ROXAS CITY – Gin-athag sang Provincial Health Office (PHO) nga wala sang direct flight gikan sa Hong Kong padulong sa Pilipinas ang ika-walo nga Person Under Investigation (PUI) sang Coronavirus Disease 2019 (COVID-19) nga napagkit sa probinsiya rason nga wala ini nakapaidalom sa 14-days quarantine.
Ini ang ginpahayag ni Provincial Health Officer Dr. Leah Del Rosario sang ma-interview sang Bombo Radyo Roxas.
Suno kay Del Rosario nga nag-abot sang Pebrero 15 ang 45-anyos nga babaye apang sang Pebrero 26 ini nagpakonsulta sa doktor bangud sa ginasuprehir nga ubo kag pagpalangatol sang tutunlan kag gilayon naman nga gin-admit sang amo nga adlaw.
Ginpahayag ni Del Rosario nga wala mapaidalom sa 14-days quarantine ang ika-walo nga PUI bangud sa wala ini nagsakay sang direct flight gikan sa Hong Kong pauli diri sa Pilipinas.
Mahibaluan nga may yara sang ginpapanaog nga travel ban ang gobyerno gikan sa China, Hong Kong, Macau kag South Korea.
Bangud sa luyag sang 45-anyos nga babaye nga makapauli ini sa Capiz, nagsakay ini sa iban nga pungsod nga wala sang travel ban.
Sa karon, yara naman sa estable nga kondisyon ang nasambitan nga ginang kag ginahulat na lamang ang resulta sang laboratory confirmation.
Apisar nga lunsay nag-negatibo ang pito ka mga PUIs sa Capiz sa nasambit nga balatian, padayon gihapon nga nagapahanumdum ang PHO sa publiko nga mangin alerto.
Nagpanawagan man ini sa publiko nga sundon ang mga ginapanugyan nga mga precautionary measures agud malikawan nga COVID-19.
