Nagpagwa sang health advisory ang Capiz Provincial Health Office (PHO) agud paandaman ang mga Capiznon sa posible nga epekto sang haze kag air pollution sa ikaayong lawas.
Sa Provincial Health Advisory No. 10, nga gin-isyu sang September 1, 2026, ginpahanumdom sang Provincial Government sang Capiz nga maghimo sang simple nga mga paghalong ang publiko kun apektado sang haze ukon polusyon ang kalidad sang hangin sa ila komunidad.
Suno sa PHO, ang haze isa ka layer sang aso, abo kag iban pa nga magagmay nga particles nga nagalutaw sa hangin.
Ang pagginhawa sang polluted air mahimo maka-irita sa mata, ilong, tutunlan kag baga, kag mahimo man magpalala sang asthma kag iban pa nga kondisyon sa tagipusuon kag baga.
Lakip sa mga sintomas nga mahimo mabatyagan bangud sa exposure sa haze kag air pollution amo ang pagka-irita ukon pagpula sang mata, pagka-irita sang ilong ukon tutunlan, pag-ubo, pagsakit sang ulo, kakulang sang ginhawa, kag discomfort ukon pagpin-ot sang dughan.
Ginpaandaman gid sang PHO ang mga kabataan, tigulang, nagabusong nga kababaihan, kag mga tawo nga may kondisyon sa tagipusuon ukon baga nga mag-doble halong.
Samtang, ginpahayag sang Provincial Health Office nga kaupod ang mga primary care facilities, ospital kag health partners, padayon ini nga nagahatag sang health information, consultation kag nagakaigo nga pag-atipan sa mga Capiznon nga mahimo maapektuhan.
