Padayon pa sa karon nga ginatul-id sang Punong Barangay sang Barangay Lanot ang mga nagakahinabo nga kinawatay ilabi na ang pick pocket sa crossing lanot.
Sa pagpakig-angut sang Bombo Radyo kay Hon. Frank “Kitoy” Cabacas, Punong Barangay sang Barangay Lanot, ginpahayag sini nga mas pasangkaron pa nila ang pagmonitor sang palibot.
Suno Cabacas nga pagatakdan sang CCTV ang pila ka mga lugar ilabi na sa Crossing Lanot agud mahatagan pa sang siguridad ang mga pasahero.
Nagapati ang Punong Barangay nga lain nga mga tawo ang nagapangbiktima bangud suno sa iya madugay niya na ang kilala ang mga vendors nga yara sa lugar kag sa kadugayon nila nga nagabaligya wala siya sang natandaan nga isa sa mga ini ang suspek sa mga kinawatay sa lugar.
Apang sa gihapon luyag niya nga makighinun-anon sa mga ini bangud nagapati siya nga makabulig ang nasambit nga mga vendors sa pagkilala sa mga tawo nga nagahimo sang indi maayo sa lugar.
Gani, panugyan sang Punong Barangay nga kun may mga tawo nga kaduda-duda sa lugar gilayon nga magreport sa ila talatapan kag pahanumdom naman sini sa mga commuters isecure ang mga kagamitan ilabi na ang wallet agud indi mabiktima sang mga kawatan.
