ROXAS CITY – Sa ikaduha nga kahigayunan, wala naman nagtambong ang pila ka mga government officials kag mga katapo sang Roxas Memorial Provincial Hospital kag iban pa nga district hospitals sa probinsiya sa imbitasyon sa sesyon sang Sangguniang Panlalawigan sang probinsiya sang Capiz.
Mahibaluan nga magasentro kuntani ang sesyon sa pagtalakay sang pondo ukon budget-deliberation sang gobyerno-probinsiyal partikular na ang pagpain sang pondo para sa mga ospital sa probinsiya.
Mahibaluan nga nagpadala na lamang sang sulat si Provincial Administrator Edwin Monares sa SP nga nagasaad sang rason sang wala nila pagtambong sa nasambit nga sesyon.
Diri nasaad nga nabaton sang gobernador sang probinsiya ang imbitasyon sang SP sa Provincial Adminstrator, Provincial Engineer, Provincial Budget Officer, Provincial Health Officer, Chiefs of Hospitals kag pila ka katapo sang RMPH.
Apang wala sila makatambong bangud posible nga makaapekto ini sa nagapadayon man nga imbestigasyon sang gintukod nga Fact-Finding Committee may kahilabtanan sa natabo nga pagkamatay sang apat ka mga pasyente sa Intensive Care Units (ICU) sa RMPH.
Nasaad man sa sulat nga pag-abot sa Annual Performance Budget para sa tuig 2020, nasumiter na nila ini sa SP kag natapos naman ang budget hearing apang wala gihapon ini maaprubahan.
Indi naman suno diri kinahanglan pa ang liwat nga pagpatigayon sang budget hearing para sa amo nga pondo sandig sa Article 415 sang Implementing Rules and Regulations (IRR) sang Local Government Code of 1991.
Ginpanindugan pa diri nga masako karon ang Provincial Health Office (PHO) kag mga chiefs of hospitals sa ila mga lihok kasunod sang novel coronavirus (nCoV) outbreak rason nga indi man sila makatambong.
Matandaan nga sa una nga ginpatigayon nga legislative inquiry in aid of legislation sang SP, wala man makatambong ang mga ini sa pihak sang imbitasyon sang konseho.
