ROXAS CITY – Masobra sa 37, 000 ka mga face masks ang natalana nga ipadala sang pila ka grupo kag barangay officials sa siyudad sang Roxas para sa mga biktima sang pag-alburuto sang bulkang Taal sa Batangas.
Ini ang ginpahayag ni Punong Barangay Lorilee Aguirre sang Barangay 5, Roxas City sang mainterview sang Bombo Radyo Roxas.
Suno kay Aguirre magluwas sa face masks magahatag man sila sang mga relief goods para sa mga biktima nga apektado sang pag-alburuto sang nasambit nga bulkan.
Suno diri nagtukod sila sang isa ka proyekto nga ila gintawag ‘Miracle of 37, 000’ agud makahatag sang bulig sa mga apektado nga residente kasunod man sang pag-ulan sang bulig sa Capiz gikan sa Luzon sadtong nagpanalasa ang bagyo nga Ursula sa probinsiya.
Gindugang pa sini nga kaupod sang mga opisyales sang ila barangay sa pagtipon sang mga bulig nga ila igapanghatag amo ang grupo sang Brotherhood of Capiz Riders kag si Councilor Jayson Tupaz sang Negros Occidental.
