ROXAS CITY – Ginpanginwala sang pila ka mga badjao ang pila ka mga alegasyon sa ila sang kadam-an nga sila nagapanakit, nagapang-away, hawid sang sindikato kag nagapangayo-kayo diri sa siyudad sang Roxas.
Sa interview sang Bombo Radyo Roxas kay Aldosalde Jumahali, tagpamaba sang mga badjao, ginpahayag sini nga ginpili nila nga magpadulong sa siyudad sang Roxas para mabuhi sang matawhay.
Ginpahayag ni Jumahali nga tuman kapigado sa ila lugar sa bahin sang Mindanao rason nga wala sila sang permanente nga ilistaran.
Bangud diri, ginpakamaayo sang iya pamilya kag iban nga kaupdanan nga mga badjao nga magsaylo sa siyudad sang Roxas bangud mas malinong diri kun ipaanggid sa mga lugar sa Mindanao sa diin masami nga may nagakahinabo nga mga kalakasan.
Ginpakigbahin man ni Jumahali ang ila mga naagyan sa kamot sang pila ka mga rebelde partikular na sa mga Abu Sayyaf.
Ginklaro sini nga indi man tanan nga mga badjao ang nagapakalimus bangud ang iban sa ila nagahimu man sang pamaagi agud nga mabuhi.
Nagapangita man ang iban sa ila sang trabaho apang wala man sila ginabaton bangud sa ila man estado.
Aminado man si Jumahali nga may yara sang iban nga mga badjao nga nagapangayo-kayo bangud ang ila ginakita nga kwarta ang husto lang para sa ila isa ka adlaw nga pagkaon.
Nagalain man ang buot ni Jumahali bangud sa mga nababaton nila nga mga diskriminasyon kag alegasyon nga wala sang kamatuoran.
Samtang, nagpanawagan naman si Jumahali sa lokal nga gobyerno nga kun mahimo indi sila pagpahalinon diri sa siyudad sang Roxas bangud wala man sila sang may ginahimo nga malain.
