Nahisugtan sang mga barangay officials kag mga college students sa Barangay Cogon, Panay, Capiz nga ipaagi sa draw lots ang pagpili sa lima ka mga scholars nga makabaton sang P20,000 sa idalom sang “Bawat Barangay Makikinabang Scholarship Program”.
Sa idalom sang programa, ginpainan ni President Ferdinand Marcos Jr. sang P100,000 para sa lima ka mga Presidential Scholars sa kada barangay.
Samtang dugang nga P100,000 naman para sa Socio-Civic Projects Fund sa kada barangay.
Sa interview sang Bombo Radyo kay Punong Barangay Ariel Basilonia, iya ginpahayag nga nagpatigayon siya sang meeting kaupod ang mga barangay officials kag 12 ka mga incoming 4th year students kag nahisugtan sang tanan nga ipaagi sa draw lots ang pagpili sang lima ka mga scholars.
Ginasiguro ni Basilonia nga mangin transparent ang barangay sa paghatag sang pondo sa mga scholars kag paggamit sang dugang nga pondo para sa pagbakal sang mga kinahanglanon sa barangay kaangay sang projector, desktop kag printer.
Sa subong, wala pa sang petsa kun san-o mabaton sang kada barangay ang kabug-osan nga P200,000.
