Nagresulta sa maduguon nga hublag protesta ang natabo sa Indonesia matapos ginkaakig sang publiko ang mataas nga sweldo kag benepisyo para sa mga lawmakers ukon mamalidha.
Suno kay Bombo International Correspondent Ginavella Limpin-Cumla direkta sa Indonesia, indi magnubo sa lima ang patay samtang ginsunog naman ang mga government buildings.
Pahayag niya, nag-anunsyo naman si President Prabowo Subianto nga kakason sang parlyamentaryo ang pila ka mga benepisyo, prebelehiyo kag foreign trips sang mga myembro agud mangin kalmado na ang publiko.
Ginmanduan man sang Presidente ang mga pulis kag militar nga hugton ang seguridad batuk sa mga naga-riot.
Apang suno sa grupo sang mga estidyante, indi bastante ang amo nga tikang bangud ang matuod nga problema amo ang inequality kag unfair politics.
