ROXAS CITY – Nag-apelar sang bulig sa lokal nga gobyerno sang Capiz pinaagi sa Bombo Radyo ang pila ka mga stranded seafarers sa Cebu City agud makapauli sa probinsiya.
Sa interview sang Bombo Radyo sa seafarer nga si Menencio Ocfemia Jr., gin-ako sini nga nagalain ang ila nga buot sa lokal nga gobyerno sang Capiz bangud nauna pa nga napapauli ang mga stranded Overseas Filipino Workers (OFW’s) gikan sa Metro Manila apisar nga sila ang una nga nagpangayo sang bulig kag nagpakig-angut sa Overseas Workers Welfare Administration (OWWA).
Suno diri bangud sa ila kagustuhan nga makapauli, sila na mismo ang boluntaryo nga nagpaidalom sa swab testing kag nagkuha sang health clearance nga amo ang partikular nga kinahanglanon sa pag-proseso sa ila nga pagpauli.
Apang nadismaya ini sang mabalitaan nga mas nauna pa nga nakapauli ang pila ka mga OFW’s gikan sa Metro Manila.
Aminado ini nga nabudlayan na sila sa ila nga sitwasyon bangud sa pang-adlaw-adlaw nila nga kagastuhanan kag may pila ka mga seafarers pa suno diri nga wala na ginabaton sa mga hotels.
Gindugang pa ni Ocfemia nga sadtong Marso 17 pa siya nakapauli sa pungsod apang naabtan ini sang lockdown sa Cebu City rason nga wala na nakapauli pa sa Capiz.
