ROXAS CITY – Ginpakigbahin sang pila ka mga commuters nga sugot sila sa bag-o nga ordinansa nga ginpapasar sang Sanguniang Panlunsod sang damlag lang kung sa diin taasan ang pletehan sa tricycle.
Sa interview sang Bombo Radyo kay Nanay Demetria, ginpahayag sini nga wala sang problema sa iya ang bag-o nga pagsuluktan apang ang problema suno diri nga may mga driver sa gihapon nga apisar may yara na sang bag-o nga taripa indi sa gihapon makontento kag kung kaisa nagaresulta pa ini sa indi pag-intindihanay sa tunga nila nga mga pasahero.
Suno kay Nanay Demetria nga kung tani bangud may ordinansa na mangin responsable na ang mga drivers kag operators sa pagpanukot kag yara na sa ila nga mga pasahero kung sila ang magahatag sang sobra ukon indi.
Ginapunto sini nga kung tani ihatag sa ila ang nagakaigo nga discount kaangay niya nga isa na ka Senior Citizen, bangud base sa iya nga na-eksperyensyahan daw palarehas na lamang ang ginasukot sang mga drivers kag operators mapa-regular man ukon indi nga mga pasahero.
Sa separado naman nga interview sang Bombo Radyo kay Nanay Teresita, ginpahayag sini nga wala siya nagakontra sa pagpataas sang pagsuluktan sa pletehan bangud halos tanan nga balaklon nagtaas na apang suhestyon lamang sini nga kung tani indi paghimuon nga rason ang pagpakay-o kag pag-ilis sang mga kagamitan sang tricycle sang mga drivers kag operators nga magpadugang pa sila sang plete magluwas sa gin-aprubahan nga ordinansa bangud suno sa iya indi man sang adlaw-adlaw nagaka-eksperyensya sila sang kaangay sini.
Matandaan nga sadtong Mayo 28, 2024 sa ginpatigayon nga regular session sang Sanguniang Panlungsod gin-aprubahan ang bag-o nga pletehan kung sa diin ang Regular Rate yara sa P15.00 Student/Senior Citizen/PWDs – (20% Discount) P10.00 samtang ang Children below 3ft ang height – free ukon wala sang bayad.
