ROXAS CITY – Nagpadulong sa Bombo Radyo Roxas ang 12 ka mga construction workers sang isa ka daku nga mall nga gina-construct sa Arnaldo Boulevard, Roxas City agud magreklamo nga wala sila ginaswelduhan sang ila nga contractor.
Sa interview sang Bombo Radyo kay Ariel Zurbito isa sa mga construction worker, ginpahayag sini nga tubtob subong wala sila ginaswelduhan sang contractor nga si Ogie Moreno sa idalom sang Sabre Company.
Magluwas diri, ginpahayag ni Zurbito nga una na ginpahayag sa ila sang amo nga contractor nga magasaweldo sila sang P450 kada-adlaw apang ginapahayag nga P400 na lamang ang ila adlaw bangud ginabuhinan pa ini sang P50 sang ila nga contractor.
Dugang pa sini nga may yara sang papel nga ginapakita ang mga construction workers sa ila contactor antes sila swelduha kun sa diin nabutang diri ang ila nga pangalan kag kun pila ka oras ang ila gintrabahuan.
Mahibaluan nga ginpadulongan sang Bombo Radyo News Team ang nasambit nga mall agud usisaon si Moreno apang ginpahayag sini nga ginaproseso pa sang ila kumpaniya ang sweldo sang mga construction workers.
Ginapahayag nga nag-angkon pa sang indi pag-intiendihanay sa tunga sang amo nga contractor kag mga construction workers.
Ini matapos nga ginpahayag ni Moreno nga didto na lamang sila magaatubangay sa talatapan sang Department of Labor and Employment kag hitsuon ang nasambit nga isyu.
