ROXAS CITY – Nagginutok sa guwa sang drug testing center sa bahin sang Barangay Tiza, Roxas City ang mga estudyante agud makapa-drug test kag makahingabot sa deadline sang pasahay sa Biyernes nga adlaw, Agosto 4 kag makapa-enrol.
Sa interview sang Bombo Radyo kay Barangay Kagawad Adonis Alejaga, nanligad pa nga semana sini natalupangdan ang pagginutok sang mga estudyante sa guwa sang drug testing center kag kadam-an diri ang kaaganhon pa lang nagapungko na sa kilid sang karsada agud magpila.
Suno kay Alejaga, ang drug test ang isa sa requirements sang pila ka buluthoan sa syudad sang Roxas antes makapa-enrol ang incoming first year students.
Natukiban man sini nga ang nasambit nga drug testing center ang mahimo lamang maka-akomodar sang 100 tubtob 150 ka mga kliyente sa isa ka adlaw, gani wala sang choice ang mga estudyante nga magbalik-balik.
Panawagan ni Alejaga sa mga natungdan nga eskwelahan nga maghatag sang konsiderasyon kag palawigon pa ang deadline agud indi mabutang sa peligro ang kabuhi sang estudyante kag makahatag sang stress.
