Pila ka mga factors sa pagmahal sang mga panakot sa merkado ginpatpat sang provincial coordinator sang agriculture

ROXAS CITY – Ginpatpat sang Provincial Agribusiness Coordinator ang pila ka mga factors sa pagmahal sang presyo sang panakot sa merkado sa probinsya sang Capiz.

Sa interview sang Bombo Radyo kay Ms. Antonette Diaz sang Provincial Agriculture Office suno diri mataas ang presyo bangud manubo ang demand sang panakot sa probinsya tuga sang pandemya.

Suno diri, wala sang dako nga produksyon ang Capiz rason nga nagakuha pa ini sang mga produkto sa nagkalain-lain nga lugar kasubong sang Iloilo, Mindoro, Mindanao, Manila kag iban pa.

Bangud sa manubo nga demand, gamay na lang nga kantidad ang ginkuha sang mga consolidator agud malikawan nga madunutan sang produkto kaangay sang sibuyas, bawang kag kamatis.

Pila sa mga factors sa pagtaas sang presyo amu ang trasportasyon, bayad sa mamumugon kag iban pa nga mga balaydan agud madala sa probinsya ang produkto.

Mahibaluan nga sa pinakaulihe nga monitoring sang natungdan nga ahensya, nagdangat sa P100 ang kada kilo sang bawang, P80 kada kilo sang sibuyas kag P50-60 ang kada kilo sang kamatis.

Dugang pa ni Diaz nga bangud man sa kalidad sang produkto nagabag-o man ang presyo sang balaklon.