ROXAS CITY – May pipila pa ka mga fish vendors sa Teodoro Arcenas Trade Center kag Burgos Talipapa nga nagabaligya sang isda nga ginadumilian nga hulikon sa Visayan Sea sandig sa Fisheries Administrative Order 167-3 ukon tatlo ka bulan nga closed-fishing season humalin Nobyembre 15, sini nga tuig tubtob Pebrero 15, sa masunod nga tuig 2020.
Sa paglibot sang Bombo Radyo News Team sa nasambit nga mga merkado, nakit-an nga may mga fish vendors nga nagabaligya sa gihapon sang tuloy kag bulaw.
Suno kay Manong Mark, isa ka fish vendor, halos adlaw-adlaw may yara sila sang tuloy nga ginabaligya sang 80 tubtob 100 pesos kada kilo nga ila ginakuha sa Libas fishing port.
Ginpahayag sini nga wala sila sang ideya natuhoy sa nasambit nga pagsulundan gani wala man sila nag-untat sa pagbaligya sang nasambit nga isda.
Suno pa diri nga magapadayon gihapon sila sa pagbaligya sang amo nga isda magluwas na lamang kun hambalan sila sang mga otoridad kag edukaron natuhoy sa amo nga pagsulundan.
Mahibaluan nga sandig sa pagsulundan nga ginpapanaog sang BFAR Regional Office 6, hugot nga ginadumilian ang pagpanakop sang mga isda nga Sardines, Herring kag Mackerel sa kadagatan nga sakop sang Visayas.
Ini agud nga mahatagan sang panahon ang amo nga klase sang isda nga makapangitlog kaangay sang “lupoy,” “silinyasi,” linatsay” ukon “manansi” sa porsyon sang Visayan Sea.
Kinahanglan nga estrikto ini nga mapatuman bangud ang sinuman nga madakpan ang may nagakaigo nga penalidad nga paga-atubangon.
