ROXAS CITY, CAPIZ- Nagserbe bilang evacuation center ang 11 tanan ka mga hulot-klasehan sang Capiz National High School sa syudad sang Roxas sang tion nga nagpamahog ang Bagyo Uwan sa probinsya.
Sa interview sang Bombo Radyo kay Mr. Charlie Begas, Principal sang Capiz National High School, iya ginpahayag nga sang Dominggo nga adlaw, Nobyembre 9, kadungan sang pag-igo sang bagyo, ginpanawag sang iya nga talatapan ang mga non-teaching staffs agud nga mag-assist sa mga evacuees.
Naka-prepositioned ang ila nga duha ka security guards kag duha ka mga utility agud nga magbulig sa mga naga-evacuate.
Suno kay Mr. Begas, pamaagi sa City Social Welfare and Development Office (CSWDO), natigayon nga maka-evacuate ang 82 tanan ka mga pamilya ukon kabaylo sa 216 ka mga indibidwal nga kadam-an halin sa Barangay Cogon.
Pahayag nya, wala man ginpabay-an sang mga katapo saqng CSWDO ang mga evacuees kag gintatap man ini sang maayo.
Sa pihak sini, dalayon na nga nakabalik ang tanan nga mga evacuees matapos nga nagtawhay ang panahon sa probinsya.
Nagbilin naman sang gamay nga halit ang amo nga bagyo sa pila ka mga hulot-klasehan sa diin nga naapektuhan ang electrical wirings sini nga sa subong, ginatinguhaan na sang mga school personnel nga makay-o.
Nahibaluan nga suspendido sa gihapon ang klase subong nga adlaw, Nobyembre 11, kag magabalik ini bwas nga adlaw sang Myerkules, Nobyembre 12.
Nagpasalamat naman ang natungdan sa Superintendent sa suporta kag pagpasiguro sa kaluwasan sang tagsa ka mga manunudlo, estudyante kag school personnels sa tunga sang pagpamahog sang Bagyo Uwan.
Interviewed by Bombo Francis Biñas
