ROXAS CITY – Nagpamatuod ang pila ka mga indibidwal nga nakasaksi nga may yara gid sang natabo nga paghatag sang P6, 000 nga kwarta sa isa ka person with disability (PWD) sa idalom sa Social Amelioration Program (SAP) sang Department of Social Welfare and Development (DSWD) kun sa diin ini ang ginkuhaan lamang sang picture kag ginbawi sa amo nga persona.
Ginpahayag ni Melanie Candelario nga yara gid siya sa likod sang iya bayaw nga si Jovanie Candelario sang nagpirma ini sang pila ka dokumento.
Nakit-an man sini ang paghatag kag pagpapitad sang kwarta antes ini ginkuhaan sang picture kag ginbawian sang nasambit nga ayuda.
Gindugang pa ni Prezel Candelario nga nasaksihan sini ang natabo kag nagapanindugan nga lunsay kamatuoran ang ginapahayag ni Jovanie.
Suno diri nga madamo sila nga nakakita sa natabo bangud naga-claim man ang mga ini sang nasambit nga ayuda.
Apang napaslawan ang mga ini nga makakuha sang picture bangud wala man sila nagdahum-dahom nga magaabot sa punto nga baliskadon sang mga taga-DSWD ang nagkalatabo.
Matandaan nga sadtong Abril 25, nagpadulong sa Bombo Radyo si Jovanie agud magreklamo matapos nadismaya ini sa natabo.
Ginbaton na lamang ni Candelario nga indi siya kuwalipikado sandig sa taga DSWD, apang masakit sa iya balatyagon ang natabo bangud suno sa iya, nahuy-an siya sa ginhimo sang taga DSWD bangud madamo nga tawo ang nakakita sang ginbawi sa iya ang kuwarta.
Kasunod sini, nangin matigdas naman ang pagpanindugan ni Syvel Billanes sang MSWDO-Panay nga wala sang kamatuoran ang mga alegasyon ni Candelario.
Iya ginpahayag nga makita sa payroll nga wala makabaton sang kuwarta ang PWD nga si Joevanie gani wala sang natabo nga pagbawi sang kuwarta.
Suno pa kay Billanes, wala man sang natabo nga pag picture kay Candelario.
Apang bwelta ni Jovanie, wala siya sang mabug-at nga rason agud hingabuton gid ang nasambit nga ahensiya ukon sinuman nga indibidwal nga konektado diri.
