ROXAS CITY – Isa naman ka ginaalegar investment scheme ang nabutang sa kontrobersiya matapos naglapta ang report nga wala na maka-pay-out ang mga investors nga nag-invest sang ila kuwarta.
Sa impormasyon nga nakalab-ot sa Bombo Radyo, may tatlo ka mga barangay nga nagaserbe pay-in area sang mga luyag mag-invest sa RGS Triple your money scheme.
Kalakip diri ang Barangay Barra, Libas kag Mongpong, Roxas City.
Ginpahayag sang pila ka mga investors sa Bombo Radyo nga wala sang problema ang pagpay-out sa Barangay Barra kag Libas bangud bisan atrasado gamay apang nagaabot man ang ila investment.
Apang nag-angkon lamang sang problema sa pay-out ang sa bahin sang Barangay Mongpong sa diin suno sa pila ka mga investors nga wala na sila nakabaton sang pay-out sang nagliligad nga mga sinimana.
Wala man sang ideya ang mga investors kun ano ang natabo sa ila investment bangud wala man sang ginahatag nga impormasyon ang ila nga upline.
