ROXAS CITY, CAPIZ- Naglab-ot sa 83 ka mga kabataang Capisnon ang nag-gradwar sang Hwebes, Hunyo 26, sa JobStart 2025 nga programa kadungan sang Job Matching Activity nga ginhiwat sa isa ka mall sa Pueblo de Panay, Barangay Lawaan, Roxas City.
Ang nasambit nga kahiwatan ang ginpangunahan sang Capiz Public Employment Service Office (PESO) sa pagpanguna ni PESO Manager John Leo Marco Beldia. Yari man diri si Atty. Luvim D. Amores, Provincial Information Officer kag Concurrent HRMO Head nga nagtiglawas sa presensya ni Governor Fredenil H. Castro agud ipalab-ot ang mensahe sang Gobernador sa mga kabataan, kag si Engr. Jessel Valad-on nga nagrepresentar sang Department of Labor and Employment Capiz Field Office.
Sa interview sang Bombo Radyo kay Mr. Leo Marco Beldia, Manager sang Public Employment Service Office (PESO), iya ginpahayag nga ang mga nag-gradwar ang nakatapos sang napulo (10) ka adlaw nga Soft and Core Skills Training sumugod Hunyo 2 tubtob Hunyo 17, agud ipreparar sa ila pagasudlan nga mga trabaho.
Dugang pa sini nga isa sa apat ka Local Government Unit sa Region VI ang Capiz nga nagpatigayon sang amo nga aktibidad.
Nahibaluan nga ika-tatlo na nga kahigayunan nga nag-implement sang amo nga programa sa probinsya.
Pahayag pa ni Beldia, agud nga mangin kabahin sang amo nga porogrma, kinahanglan nga malab-ot ang qualifications nga kaangay sang citizenship, yara sa legal nga pang-edaron, kag no work experience.
Pamaagi sa Jobstart Philippines, mahatagan sang kahigayunan ang mga nagpasakop nga makakita gilayon sang trabaho.
Sa probinsya sang Capiz, may yara sang walo ka mga partner agencies nga nagtan-ay sang 90 vacancies para sa mga nagpasakop sa amo nga programa.
Samtang, pagkatapos sang seremonya, ginpatigayon man ang Job Matching Activity agud nga ma-interview sang mga partner agencies ang mga kabataan nga nagpasakop sa programa agud maasister kag mahatagan sang nagakaigo nga trabaho.
With a report from Bombo Sunnie Mae Batencila
