Pila ka mga manunudlo, nagpabutyag sang kalain sang buot sa nangin pahayag ni Usec. Claire Castro

Nagpahayag sang kalain sang buot  ang pila ka mga manunudlo sa nangin pahayag ni Usec. Claire Castro pagkatapos sang insidente sang pagpangluthang sa Zamboanga City.

Sa interview sang Bombo Radyo, kay Darlene Blando-Surriga, miyembro sang Alliance of Concerned Teachers, iya ginpahayag nga nakabatyag sila sang kaakig bangud sa ila panan-aw nga daw wala sang delikadesa ang amo nga paghambal sa publiko.

Suno kay Surriga, ang mga manunudlo amo ang nagatindog bilang ikaduha nga ginikanan sang mga estudyante kag halos tanan sa ila nagadedikar sang ila kabuhi sa pagtudlo.

Pahayag pa niya, daku nga insulto sa mga manunudlo ang amo nga pahayag bangud ginahatag nila ang ila panahon, kusog kag dedikasyon para sa pag-amuma kag pagtudlo sa mga kabataan.