ROXAS CITY – Nakahanda nga magsunod ang pila ka mga online sellers sa Roxas City sa pagsulundan sang Department of Trade and Industry (DTI) nga i-post nila ang presyo sang ila ginabaligya online.
Suno kay Isay nga wala sang problema sa iya ang pagsunod sa amo nga laye.
Daku man ini nga bulig suno diri bangud mapahagan-hagan ang ila gina-akomodar nga customers nga naga-private message sa ila.
Aminado ini nga nasabaran man siya sa madamo nga palamangkutanon sang customers nga naga-mensahe sa iya.
Ginpahayag naman ni Christine nga pabor man siya sa amo nga laye.
Suno diri nga sang una, wala nila ginalakip sa ila ginapost ang presyo sang ila ginabaligya agud makalikaw sa mga scammers.
Suno sa iya nga kun ibutang nila ang presyo, posible nga magtanyag ang mga online scammers sang mas barato nga presyo kag posible nga madamo ang matuntunhan nga manugbakal.
Apang bangud mas nagapangibabaw ang laye, handa sila nga ibutang ang presyo sang ila ginabaligya online bangud nahangpan man sini nga may nagakaigo nga penalidad ang indi magsunod sa amo nga pagsulundan.
Mahibaluan nga nagapangabay ang DTI sa mga online sellers sa Facebook nga i-post ang actual nga presyo sang produkto ilabi na kun ini ang mga basic prime comodities agud mahibaluan kung nagasunod sila sa mga suggested retail price sang ahensya.
