Ipa-subpoena sang National Bureau of Investigation (NBI) ang pila ka mga opisyal sang Philippine Southeast Asian Games Organizing Committee (PHISGOC) sa Lunes, Hulyo 20.
Suno kay NBI Director Melvin Matibag may yara na siya sang kopya sang mga pangalan nga ipadala upod sa subpoena.
Kalakip diri ang mga mataas nga opisyal sang komitiba, lakip na ang chairman, presidente kag incorporator sang kompaniya nga involved sa pagtukod sang kontrobersyal nga New Clark City Sports Complex sa Tarlac.
Ginpanindugan ni Matibag, kabahin ini sang fact-finding investigation sa paggamit sang pondo nga una na nga ginpain para sa 2019 Southeast Asian (SEA) Games.
Ginpasalig man sini nga ang tanan nga involved kag responsable sa kasubong nga proyekto pagasundon sang gobyerno.
Antes sini, ginpahayag sang opisyal nga posible man nga ipatawag si Department of Public Works and Highways (DPWH) Secretary Vince Dizon sa ila fact-finding investigation agud mamangkot angot sa gintukod nga sports complex.
