Pila ka mga Overseas Filipino Workers sa Israel, nagakabalaka sa padayon nga tensyon sa tunga sang Israel kag Iran

Nagakabalaka ang pila ka mga Overseas Filipino Workers (OFW) sa Israel sa padayon nga tensyon sa tunga sang Israel kag Iran.

Suno kay Bombo Elvie Pregua, International Correspondent direkta sa Israel, iya ginpahayag nga asud-asud sa gihapon ang pagnilupok sang missiles sa kalangitan.

Pahayag pa niya, bangud sang pagdampig sang Estados Unidos sa Israel, madamu na nga mga pungsod ang nadalahig sa kinagamo.

Dugang pa sini, madamu na sang mga pumuluyo ang nagatinir sa mga bomb shelter bangud sang pamahog sang posible pag-igo sang mga missiles kag rockets sa lugar.

Nagalaum man ang natungdan nga ma-untat na ang giyera agud wala na sang mga inosente nga tawo ang magasakripisyo ang ila sini nga kabuhi.