ROXAS CITY, CAPIZ – Nakabenepisyo ang pila ka mga Person Deprived of Liberty (PDL) sa Capiz Rehabilitation Center (CRC) sa mga programa nga ginpatuman sang Department of Education (DepEd) Schools Division of Roxas City kag Technical Education and Skills Development Authority (TESDA).
Sa interview sang Bombo Radyo Roxas kay Mr. Arjuna Yngcong, jail warden sang CRC, ginpahayag sini nga madinalag-on nga nakagradwar ang walo (8) ka PDLs sa elementarya kag siyam (9) sa high school sa idalum sang Alternative Learning System (ALS) program sang DepEd.
Samtang, nagtapos man ang 50 ka PDLs sa kurso nga Rag Making sa idalum sang programa sang TESDA, nga aktibo man nga ginpartisiparan sang mga inmates. Malipayon nga ginbaton sang kada isa ang ila sertipikasyon nga ginpresentar sa ginpatigayon nga seremonya.
Suno kay Yngcong, padayon ang ila handum nga pasangkaron ang mga programa sa pasilidad, agud mangin mapuslanon ang oras sang mga PDLs kag makabulig sa ila pagbag-o.
Panawagan man ni Warden Yngcong sa publiko nga luwas sa pagbantay sang seguridad sang mga PDLs, padayon man ang ila matuod-tuod nga pagserbisyo, kag ginapasalamatan niya ang suporta nga ginahatag sang komunidad sa CRC.
