Nabatyagan na sang pila ka mga Pinoy sa Sri Lanka ang pagsaka sa presyo gatong bangud sa padayon nga tensyon sa Middle East.
Suno kay Bombo Priscilla Rollo Wijesooriya, International Correspondent sa Sri Lanka, ang pagsaka sang presyo sang gatong ang may epekto sa pila ka mga pumuluyo, apang indi ini tuman ka grabe kun ipaanggid sa Pilipinas.
Gin-athag sini nga apisar may gamay nga pagtaas sa presyo sang gatong, wala man sila nag-antos sang tuman bangud may yara na sang oil supply halin sa India nga nag-abot nga ginalauman nga magalawig tubtob sa bug-os nga bulan sang Abril.
Pahayag pa niya, may mando ang gobyerno sang Sri Lanaka nga may limitasyon ang pagbakal sang gatong, kon sa diin lima ka litro lang kada semana para sa mga motorsiklo kag 15 ka litro para naman sa dalagku nga mga salakyan.
Dugang pa niya, nagapabilin nga stable ang presyo sang mga balaklon sa nasambit nga pungsod.
Sa pihak sang sitwasyon, ang gobyerno sang Sri Lanka padayon nga nagahimo sang mga tikang agud masiguro ang nagakaigo nga suplay sang langis kag ginapasiguro man nga indi maapektuhan ang adlaw-adlaw nga kabuhi sang mga pumuluyo, lakip na ang mga Pilipino nga nagapuyo kag naga-obra sa nasambit nga pungsod.
