ROXAS CITY – Pila ka mga progresibo nga grupo nagpatigayon sang hublag protesta sa People’s Park, Brgy. Baybay syudad sang Roxas ini nahanungod sa pagtagtaganay sang ayuda kag “no vaccine, no entry” policy.
Sa interview sang Bombo Radyo Roxas kay Monica Cabantug, isa sa mga nagapatigayon sang hublag protesta, ginpahayag sini nga indi dapat pagpiliton ang pagpabakuna bangud kun magmalasakit ang iya bug-os nga pamilya epekto sang vaccine indi man makabulig ang gobyerno.
Suno pa diri nga indi bulong ang vaccine sa kaimulon sang mga pumuluyo kag dapat tutukan sang gobyerno ang paghatag sang libre nga pagkaon kag vitamins agud mapabakod ang resistensya.
Aminado man ini nga nakapabakuna na siya sang first dose bangud napilitan lang ini kag may yara ini sang ginasuprehir nga balatian.
Gintuad man sini nga isa pa gid sa rason kun ngaman nagpabakuna siya agud makakuha sang vaccination card agud makaguwa kag ini ang ginapangita kun magsulod sa pila ka mga establisyemento.
Luyag sang iya grupo nga ibasura na ang “no vaccine, no entry” policy.
Ginpahayag man sini nga dapat mahatag na ang nagakaigo nga ayuda para sa mga pigado nga pumuluyo kag indi dapat pagpilion kun sin-o lang ang makabaton.
Mahibaluan nga ang mga grupo nga nagpatigayon sang hublag protesta ang ginakabug-usan sang Gabriela, Makabayan, Anak-bayan, Kadamay, Mangingisda, Malakaya, kag madamo sang iban pa.
