ROXAS CITY – Lakut ang nangin reaksyon sang mga pumuluyo matapos nga ginpirmahan ni President Ferdinand Marcos Jr., ang executive order nga optional na lang ang pagsuksok sang facemask sa mga bukas ukon indi gutok nga mga lugar.
Sa pakig-angut sang Bombo Radyo kay Steve Alilagay, suno diri pabor siya nga boluntaryo na lang ang pagsuksok sang facemask apang luyag sini nga magsuksok sa gihapon ilabi na kun madamo sang tawo ang lugar.
Suno naman kay Glory Galleva, importante sa gihapon ang pagsuksok sang facemask bangud proteksyon ini sa mga iban pa nga mga balatian indi lamang COVID-19.
Dugang pa sini nga, nagkalain-lain nga indibidwal ang iya nakaka-atubang kag mabudlay matumod kun ini bala ang kumpleto na sa bakuna ukon indi.
Para naman kay Barbara Roxas, kinaangdan na ang pagsuksok sang facemask sa sulod sang kapin tatlo ka tuig.
Ginsiling sini, nga bangud sa kadugayon sang pandemya nangin kabahin na sang fashion ukon porma sang isa ka tawo ang facemask.
