ROXAS CITY – Amat-amat na nga nagaalabutan ang mga pumuluyo sa tanan nga mga patyo kag columbariums sa pungsod antes ang adlaw nga temporaryo ini igapasarado humalin Oktubre 29 tubtob Nobyembre 4.
Sa paglibot sang Bombo Radyo News Team sa pila ka mga patyo sa siyudad sang Roxas makita ang pag-alabutan sang mga tawo agud magbisita sa ila mga nagtaliwan nga himata.
Suno sa pila ka nga pumuluyo nga subong pa lamang nga adlaw Oktubre 28 mas ginpakamaayo na lamang sang iban nga magbisita sa mga patyo.
Magluwas diri, makita man ang presensya sang mga negosyante nga nagabaligya sang bulak kag mga kandila.
Samtang, yara man ang pila ka mga kapulisan kag force multipliers nga naka-deploy sa amo nga patyo agud nga magpabilin sang kalinong kag katawhay sa palibot.
Mahibaluan nga pagadumilian anay ang pagbisita sang mga pumuluyo sa tanan nga mga patyo, memorial parks kag columbariums sa pungsod subong nga nagahilapit ang adlaw sang Pista Minatay.
Ini sandig sa issue nga ginpaguwa nga Inter Agency Task Force Resolution No. 72 agud man malikawan ang pagdinaguso sang mga tawo kag malikawan nga malatnan sang COVID-19 virus.
Hugot naman nga ginapanugyanan ang mga pumuluyo nga magsunod sang nagakaigo nga mga minimum health standards kapareho sang pagsuksok sang facemask kag faceshield subongman ang pag-obserbar sang social distancing.
