Pila ka mga residente sa Nepal ang naka-eksperyensya sang tuman nga trauma pagkatapos sang makahalalit nga flash flood nga nag-igo sa bahin sang border sang Nepal-Tibet sang Agosto 26.
Suno kay Bombo Sangeeta Basnet, International Correspondent direkta sa Nepal, makakulugmat ang sitwasyon bangud sang mga biktima nga ila nakita kag paghinibi sang mga pamilya nga nagapangita sang ila mga pinalangga.
Samtang, ginkumpirmar naman sang Nepal Tourism Board nga isa ka Pinoy ang nalakip sa 644 ka mga biyahero nga una nga ginreport nga missing matapos ang flash flood.
Dugang pa, mangin mabudlay sa gihapon ang search-and-rescue operations sa mga apektado nga lugar, bangud sa kakitid kag madamo nga mga dalan nga tuman na nga naguba.
Padayon naman nga nagalaum ang mga pamilya nga makit-an ang ila nadula nga mga himata kag makabalik pa ila mga panimalay nga buhi.
