ROXAS CITY – Makabig nga makaalarma ang sa karon nga ginaeksperyensya sang pungsod China amu man sa pila ka mga pungsod sa Europa kag Amerika.
Ini ang ginpahayag ni Mr. Greg V. Aguilar, Bombo International Correspondent sa California sang ma-interview sang Bombo Radyo.
Suno diri, padayon sa gihapon ang pagtaas sang temperatura sa mga nasambit nga lugar kun sa diin nagaresulta sang tagtuyot ukon pagmala sang mga katubigan kapareho sang linaw kag suba.
Bangud diri, apektado man ang sektor sang agrikultura, amu man ang mga hydroelectric plants nga nagasuplay naman sang kuryente bangud wala na ini nagafunction kun below minimum ang lebel sang tubig.
Suno diri, makabig historical ang nagakatabo subong nga tuig sa klima, gani kinahanglan na ini nga maaksyunan.
Bilang aksyon naman suno diri ni US president Joe Biden, naghatag ini sang alokasyon nga $369 bilyon para sa energy security kag agud mabatuan ang climate change sa ila pungsod.
Ginpahayag ni Aguilar nga sa tuig 2030 tuyo sang US nga mabuhinan ang ila greenhouse emission kag sa tuig 2035 naman mangin 0 emmision vehicle na ang kalabanan nga ila pagagamiton.
Nagapati siya nga magapadayon pa ang nabatyagan nga heatwave kag magataas ang water level sang tubig bangud nagakatunaw ang mga iceberg sa Antarctica, gani panugyan sini nga magbuliganay ang tagsa ka mga pungsod agud mapahagan-hagan ang climate change.
