BATANGAS – Asud-asod nga pagtay-og ang nabatyagan sang linibo ka mga residente sa Batangas matapos ang pag-alburoto sang bulkang Taal.
Sa interview sang Bombo Radyo Roxas kay Mr. Eugene Reyes sang Balangon, Agoncillo, Batangas ginpahayag sini nga nakita nila mismo ang pagbuga sang madamol nga aso nga nagapanimaho asupre kag mga pula nga lava gikan sa bulkan rason nga nag-evacuate ang mga ini.
Mabaskog kag mahina nga pagtay-og naman ang ila nabatyagan kag wala sang untat nga pag-ulan sang mga bato sa ila lugar gani wala na ang mga ini nagpangduha-duha nga maghalin sa ila gina-istaran.
Dugang pa sini, bangud sa madamol nga abo nga ginpaguwa sang bulkang Taal, halos nagdulom ang ila palibot kun sa diin nagdalagan ang mga residente palayo apisar nga wala sila sang ideya kun sa diin sila makadto resulta sang tuman nga kahadlok.
Bangud diri, madamo nga mga residente ang nahalitan, napilasan kag naaksidente bangud sa pag-evacuate.
Samtang, kakulangan naman sa suplay sang kuryente, gaas, tubig kag pagkaon ang problema karon sang mga residente sa pila ka mga lugar sa Tagaytay City bangud sa padayon nga pag-alburoto sang Bulkang Taal.
Ini ang ginpahayag ni SK Federation President Lois Andrea Palo sang Sungay West, Tagaytay City sang mainterview sang Bombo Radyo Roxas.
Suno kay Palo, nabudlayan sa karon ang mga residente kun sa diin sila magakuha sang ila pagkaon bangud halos sirado na ang mga malls, grocery stores kag iban pa nga mga establisyemento komersyal bangud sa padayon nga pag-ulan sang lapok sa ila lugar.
Apektado man ang pila ka mga kaiping nga lugar sa probinsyan sang Cavite kaangay sang General Trias, Carmona, Silang kag Bacoor.
Kanselado naman ang klase sa nagkalain-lain nga buluthuan kag unibersidad sa nasambit nga lugar.
Ginpahayag ni Palo nga asud-asod nga pagtay-og man ang ila nabatyagan kag wala sang untat nga pag-ulan sang mga bato ang nabatyagan sa ila lugar.
Bangud diri, ginganyat naman sang mga Local Government Units (LGUs) sa Tagaytay City ang “total evacuation” sa Isla sang Taal Volcano kag sa iban pa nga high-risk areas.
Dugang pa sini nga mas ginpili na lamang sang mga residente nga temporaryo magpabilin sa mga evacuation centers agud malikawan ang mga peligro nga tuga sang naga-alburoto nga Bulkang Taal.
Samtang, mas ginpakamaayo naman sang mga residente nga isulod sa ila balay ang mga hinuptan nga sapat.
