ROXAS CITY – Nagasinggitan ang pila ka mga residente sang Barangay Bunga, Panay Capiz, matapos ginapahayag sang mga ini nga wala sila nadala sa listahan sang emergency cash assistance apisar nga biktima man sila sang nagtupa nga Bagyong Paeng sa probinsya.
Sa interview sang Bombo Radyo kay Nanay Amy Bechayda isa sa mga nagareklamo, ginpahayag sini nga daw kaangay may pinilian ang pagpanglista sa ila barangay bangud siya mismo suno diri kag iya pamilya naapektuhan man sang amu nga bagyo kag na-eksperyensyahan pa nga magkatulog sa higad sang dalan apang wala nadala sa listahan.
Apang ang iban suno diri nga indi man tuman apektado sila pa ang yara sa listahan kag makakuha sang amu nga bulig kag iban may pwesto pa sa ila barangay.
Mahibaluan mahimo nga makabaton sang P5,000 ang apektado nga residente nga partially kag P10,000 naman ang totally damaged.
Dugang pa ni Bechayda nga sa ila pagpamangkot sa BHWD sang ila barangay nga si Rosabella Besana, ginsiling sini nga ang kada isa ka konsehal duha lamang ka residente ang mahimo niya nga pillion kag ilakip sa listahan.
Ginmanduan man sila suno diri nga magpadulong sa talatapan sang ila DSWD agud ipalab-ot ang ila reklamo, apang ginpabalik sila sa ila Barangay.
Dako lang suno diri ang ila kalain sang buot bangud daw kaangay nga ginahampangan sila kag ginapasa-pasahan.
Panugyan sini nga kun tani mangin patas lang kag hibaluon sang matuod kun sino ang lubos nga nagakinahanglan.
