Isa ka ginang nga residente sang Sentro, Barangay Dinginan, Roxas City nga wala nakabaton sang bugas gikan sa Roxas City government ang nagreklamo.
Suno kay Manang Susan nga kasubong pinamilya na gid lamang ang naka-ambit sang ginasiling ayuda sang gobyerno sa mga pumuluyo sa ila barangay bangud pinilian lamang ang ginahatagan.
Nagapati man ang ginang nga may lamud pamulitika ang distribusyon sang bugas kag ginapili lamang ang hatagan.
Samtang sa pagpangusisa sang Bombo News team, ginpahayag naman ni Manong Dan sang Barangay Dinginan, nga wala nagalain ang iya buot nga wala makabaton sang ginpanagtag nga bugas sang gobyerno sang syudad.
Apang ginakwestyon lamang sini ang wala pagdala sang bugas sa barangay hall sa baylo ginpahamtang ini sa balay ni anay kapitan Iluminado Corros kag sa isa ka area sa nasambit man nga barangay.
Para kay Manong Dan nga indi ini maayo nga ehemplo sa mga pumuluyo, bangud ginapakita lamang diri nga may pinilian ang ginahatag nga bulig sang gobyerno sang syudad.
Ginkabig man ni Manong Dan nga kasubong BUgas para sa LP kag indi bugas para sa mga taga Roxas City ini bangud indi man alalangay ang ila nangin distribusyon.
Nahibaluan pa gikan diri nga tobtob sa karon nagapabilin nga promesa lamang ang ginbuy-an sang alkalde sang syudad nga makabaton sang 10 kilos nga bugas kada bulan ang mga tricycle drivers bangud wala pa ini sang may nabaton nga bugas.
