ROXAS CITY – Nagpatigayon sang isa ka special session ang Sangguniang Panlungsod agud mapasangkad pa ang mga lihok sang gobyerno sang siyudad batuk sa coronavirus disease (COVID-19).
Pila ka mga resolusyon ang ginpapasar sa nasambit nga sesyon nga magapahugot pa sang mga pagsulundan sandig sa ginapatuman nga mga inisyatibo agud mapunggan nga makasulod ang amo nga balatian sa siyudad.
Kalakip na diri ang hugot nga pag-implementar sang 24 hours curfew sa mga senior citizens kag estudyante ukon menor-de-edad nga amo ang ginapahayag may dako nga risgo nga malatnan sang amo nga balatian bangud sa ila mahina nga immune system.
Ginpapasar man ang resolusyon nga nagapatuhoy sa isa ka funeral home nga amo ang magatan-ay sang funeral services sa tion nga may mapagkit nga mapatay nga Person Under Investigation (PUI) ukon Person Under Monitoring (PUM) sa siyudad.
Diri may pagasundon nga mga pagsulundan kag proseso ang isa ka funeral home sa pagpalubong sa isa ka PUM ukon PUI.
Naaprubahan man ang resolusyon kun sa diin ginahatagan sang direktiba sang lokal nga gobyerno sang siyudad ang mga kabaranggayan nga magbulig sa pagpahugot pa sang mga border control sa siyudad.
Pinaagi sa Executive Order NO. 14, series of 2020 nga una na ginpapanaog ni City Mayor Ronnie Dadivas, igapatuman ang Enchanced Border Restrictions kag Quarantine Protocols ukon mas hugot nga pagsulundan sa pagpasulod sa mga borderlines sang Roxas City.
Ginpapasar man sa amo nga sesyon ang resolusyon nga nagadeklarar sang state of calamity sa siyudad bangud sa COVID-19.
