Nagpahayag sang kabalaka ang pila ka mga rice retailers sa Roxas City matapos gin-anunsyo sang Department of Agriculture ang plano nga pagpatuman sang P53 kada kilo nga Suggested Retail Price para sa lokal nga bugas.
Sa interview sang Bombo Rdayo kay Edilberto Cambe, presidente sang Roxas Rice Retailers Association, iya ginpahayag nga posible nga mapierde ang mga manugbaligya kon gulpihon dayon ang implementasyon sang amo nga presyo bangud sang mataas nga capital kag iban pa nga galastuhan sa negosyo.
Suno kay Cambe, antes sini nagpatuman naman ang gobyerno sang P50 nga price cap sa imported rice bilang kabahin sang tikang sang administrasyon ni Presidente Ferdinand Marcos Jr. agud mapahagan-hagan ang epekto sang pagsaka sang presyo sang bugas sa merkado.
Pahyag pa niya, nagpakighinun-anon man ini sa tanan nga miyembro sang ila asosasyon agud mahibaluan ang ila tagsa ka sentimyento kag reaksyon nahanungod sa nasambit nga mando sang talatapan.
Dugang pa sini, handa gihapon sila nga magsunod sa mandato sang Department of Agriculture bilang pagrespeto sa programa sang gobyerno nga mapababa ang presyo sang bugas kag mabuligan ang mga konsumidor.
