ROXAS CITY – Ginkompirmar sang isa ka Sangguniang Bayan Member nga may yara sila sang ginasunod nga Internal Rules of Procedures ukon IRP sa ila nga quorum sa tagsa ka magpatigayon sang session sa banwa sang Sapian, Capiz.
Sa interview sang Bombo Radyo ka SB Member Ferdinand Baguio nga nagpatigayon sila sang session kahapon Setyembre 28 kaupod ang apat ka iban pa nga SB Member apisar nga wala ang presiding officer kag lima ka iban pa nga mga SB Member.
Suno kay Baguio nga lima sila ang nagtambong sa session kun sa diin ginalakipan ini nanday SB Members Orelio, Cordero, Obordo kag Gallardo ukon ginatawag nila nga Team BOCOG.
Bangud wala ang presensya sang presiding officer nga si Vice Mayor Ralph Ordunia ginpakamaayo sini nga i-nominate si Cordero nga temporaryo nga magatal-os anay sa nasambit nga posisyon agud matigayon ang ila session.
Gilayon man ini nga gin-aprubahan sang mga nagtambong nga konsehal.
Mahibaluan nga wala ang presensya sang lima ka iban pa nga SB Members magluwas lamang sa Team BOCOG kag Vice Mayor Ordunia.
Ginkatingala ini ni Baguio rason nga namangkot ini sa sekretarya kun sa diin nagkadto ang iban nga mga konsehal subongman ang presiding officer kag didto nabal-an nga nag file sang leave of absence ang duha ka mga konsehal.
Apang, may yara sa gihapon sang tatlo ka iban pa nga absent ukon wala nagtambong sa nasambit nga session.
Mahibaluan nga gintalakay sa nasambit nga session ang pondo sang Bayanihan Grant, committee of chairmanship kag pag-aprubar sang pondo sang SK kag mga kinahanglanon sang ila banwa.
Apang, ginapatihan nga kasubong wala nagtambong sa nasambit nga session ang tatlo ka mga SB Members kalakip na si Ordunia.
Dugang pa sini nga nagasandig lamang sila sa mga ginapatuman nga provision ukon IRP sa tagsa ka magpatigayon sila sang session.
Samtang, ginpahayag naman ni Baguio nga ginarespeto man nila ang iban nga mga miyembro sang Sangguniang Bayan kun ano man ang ila tagsa ka mga rason sa indi pagtambong sang iban ka mga konsehal sa nasambit nga session.
