Pila ka mga tawo ang napatay kag nasamaran sa insidente nga gintunaan sang daku nga sunog sa Canadian Forces Base Wainwright sa Alberta, Canada.
Ginkumpirma ni Canadian Defence Minister David McGuinty ang mga napatay kag mga pilason, apang wala niya gintumod ang eksakto nga kadamuon sang mga biktima kag ang kabangdanan sang insidente.
Suno kay McGuinty, nagapadayon pa ang pagresponde sa insidente kag nagapabilin nga seryoso ang sitwasyon sa military base nga nahamtang sa 210 kilometers Eastern Edmonton.
Padayon naman ang imbestigasyon sang Canadian military kag Royal Canadian Mounted Police sa insidente.
Suno sa lokal nga gobyerno, nakalab-ot ang kalayo sa kaiping nga distrito matapos magtabok sa kudal sang base. Apang wala pa sang mando nga ginpagwa para sa pag-evacuate sang mga residente.
Pahayag ni Canadian Prime Minister Mark Carney nga nakig-coordinate na ang national government upod sa gobyerno sang Alberta kag lokal nga mga awtoridad sa pagsabat sang sitwasyon.
Ginpasalig ni General Jennie Carignan, hepe sang Canadian Armed Forces nga ang ila prayoridad amo ang kaluwasan kag kaayuhan sang mga katapo sang militar, sang ila mga pamilya kag sang komunidad sa palibot sang base.
