ROXAS CITY – Nagawangal sa karon ang pila ka mga tricycle drivers sa siyudad sang Roxas bangud sang pigado nga kita sa ila pag-biyahe kasunod sang pagpatuman sang ‘one passenger’ policy bangud sang coronavirus disease (COVID-19) pandemic.
Suno kay Manong Toto sang Barangay Lawaan, tuman sila nga pirde kun tag-isa lamang ka pasahero ang ila nga pasakyon kag duha ka adlaw sa sulod sang isa ka semana lamang sila pahanugutan nga mag-biyahe.
Panawagan sini nga kuntani sa idalom sang general community quarantine (GCQ), pahanugutan sila nga magpasakay sang tatlo ka pasahero bangud duha ka beses sa isa ka semana lamang sila nagabiyahe.
Kun tag-isa gid lamang ka pasahero ang ila masakay, kuntani pahanugutan na lamang sila nga magbiyahe adlaw-adlaw suno diri agud makasustenir man sa ila pang-adlaw-adlaw nga kinahanglanon.
Ginpahayag naman ni Manong John sang Barangay Lanot, kulang gid para sa ila pang-adlaw-adlaw nga kinahanglanon ang ginakita subong bangud duha ka beses sa isa ka semana lamang siya naga-biyahe kag isa gid lamang ka pasahero ang mahimo niya mapasakay.
Indi man mahimo suno diri nga magsupak sila sa pagsulundan bangud tuman kadako sang penalidad nga mahimo nila bayaran.
Mahibaluan nga bangud sang pandemiya, hugot nga ginapatuman karon ang ‘one passenger’ policy sa mga naga-biyahe nga tricycle.
Ginlimitahan man ang pagbiyahe sang mga ini pinaagi sa pagpatuman sang number coding scheme sandig sa punta sang city number sang tricycle.
Bangud sa apelar sang natungdan nga sektor, gin-aprubahan man sang Roxas City council ang temporaryo nga P10 nga flagdown rate sa pletehan para sa una nga isa ka kilometro kag dugang nga P5 para sa succeeding kilometers.
