Padayon nga nabatyagan sang pila ka mga tricycle driver sa Roxas City ang kabudlayan bangud sa padayon nga pagtaas sang presyo sang gatong, apisar pa nga may rollback sa gatong.
Sa interview sang Bombo Radyo kay Joseph Soberano, spokesperson sang Roxas City Tricycle Operators, Drivers Association, iya ginpahayag nga kasubo sang sitwasyon bangud gamay lamang ang gina-rollback apang mas daku naman ang mga asud-asud nga pagtaas sang presyo sang gatong nga ila ginaatubang.
Suno kay Soberano, halos 85% sang kita sang mga tricycle driver ang nagakadto lang sa gatong kag boundary, rason nga ginakulang na gid ang nabilin nga kita nga ila madala pauli sa ila panimalay.
Pahayag ni Soberano, madamu na sa ila mga miyembro ang napilitan nga magtrabaho na lang anay temporaryo sa construction kag iban pa nga klase sang obra agud may masustener ang pang-adlaw-adlaw nga kinahanglanon sang ila pamilya.
Dugang pa sang natungdan, pending pa sa subong ang ila ginapangabay nga dugang pamasahe sa Roxas City Government, bangud wala pa gin-aapprove ang pinal nga desisyon kasunod sang mandato ni President Ferdinand Marcos Jr.
Nagalaum man ang natungdan nga mahatagan sang dugang nga suporta ang sektor paagi sa posible nga second tranche sang cash relief assistance kag fuel subsidy agud mahagan-hagan ang epekto sang mataas nga presyo sang gatong sa ila pangabuhian.
