Nakabatyag sang kabalaka ang pila ka mga vendor sang baboy sa Teodoro Arcenas Trade Center matapos makumpirma ang kaso sang African Swine Fever (ASF).
Sa interview sang Bombo Radyo kay Punong Barangay Roberto Ross Roldan sang Barangay Adlawan, Roxas City kag isa man ka meat vendor, iya ginpahayag nga nakibot sila sa resulta sang blood samples sang mga baboy nga nagpositibo sa ASF.
Suno kay Roldan, ini nga hitabo nagdugang sang kahangawa sang mga nagabaligya kag mahimo magresulta sa pag-iban sang kita bangud sa kahadlok sang mga konsumidor nga magbakal sang karne sang baboy.
Sa pihak sang kahimtangan, ginpahayag sang mga vendor nga magapadayon gihapon sila sa ila pagbaligya sa merkado, apisar sang nagasaka nga pamahog sa ASF.
Nahibaluan nga base sa laboratory testing sang Regional Animal Diseases and Diagnostic Laboratory (RADDL) VI, kumpirmado nga nag-positibo sa ASF ang mga blood samples sang baboy nagikan sa banwa sang Panitan, Pontevedra, kag syudad sang Roxas.
Nagpanawagan man ang mga ini sa publiko nga siguruhon nga sa lehitimo kag inspektado nga mga talipapa ukon tindahan magbakal sang karne sang baboy agud malikawan ang posibleng kontaminasyon kag maprotektahan ang kabuhi sang pamilya.
