ROXAS CITY – Dismayado ang pila ka mga vendors sang Teodoro Arcenas Trade Center (TATC) matapos wala makabaton sang P3,000 nga financial assistance kag food packs nga ginpanagtag sang Department of Social Welfare and Development (DSWD) kahapon nga adlaw sa Capiz Villareal Stadium.
Suno kay Manang Jojie Corros, negosyante sang uga nga sila nga mag-ilinguday sang pwesto sa nasambit nga merkado publiko ang wala maka-ambit sang nasambit nga ayuda.
Ginpahayag sini nga ila lamang ginkakibot sang nagpadulong na ang iban nga mga vendors sa Villareal Stadium agud magkuha sang ayuda.
Nagalain naman ang buot ni Manang Lalyn matapos ginpahayag nga wala ini nalakip sa listahan sang makabaton sang ayuda.
Suno kay Manang Lalyn nga wala ini nakahibalo nga may nagpang-lista sa mga makabenepisyo sang ayuda.
Ginpahayag sang ginang sang nabal-an sini nga may iga-release nga financial assistance kag food packs madasig ini nga nagpadulong sa Capiz Villareal Stadium apang gindumilian ini nga makasulod bangud wala ini malakip sa listahan.
Mahibaluan nga halos 20 sila nga mga negosyante ang wala nakabaton sang ayuda.
