Nagahilibion nga ginsaysay sang isa ka vendor ang natuhoy sa ginpatigayon nga clearing operation sa ila pwesto sa burgos talipapa.
Sa interview sang Bombo Radyo kay Nanay Merly, vendor sa burgos talipapa, ginpahayag sini nga naghinyo pa suno ini kaupod ang iban pa sini nga mga kaupdanan nga kun tani hatagan sila danay sang extension tubtob sa palaabuton nga bulan sang disyembre.
Dugang pa sini, ginkakibot nalang nila nga ginpang-demolish na ang ila tagsa ka mga pwesto kaina sang aga, Nobyembre 9 kasunod sa mandu ni Roxas City Mayor Ronnie Dadivas.
Nahibaluan nga ginpangsaylo ang mga vendors sa burgos talipapa bangud sa nagaginutok na ang trapiko sa karsadahon sa lugar.
Samtang, yara sa kapin 300 ka mga vendors sang isda, karne, utanon, prutas, kag iban pa ang ila gin-asisteran sa pagbalhin sa TATC agud mahatagan sang ligwa ang trapiko sa Burgos Street.
