ROXAS CITY – Gindayaw sang pila ka miyembro sang Sangguniang Panlalawigan ang kaisog ni Board Member Weldie Apolinario nga ipalayag ang iya hibubun-ot kag sentimyento natuhoy kay Provincial Administrator Edwin Monares.
Mahibaluan nga sa sesyon sang konseho sang gobyerno-probinsiyal, ginbasa ni Apolinario ang kaundan sang iya nga open letter nga naka-address kay Governor Esteban Contreras nga nagapa-revoke sang appointment ni Monares.
Diri maisog nga ginpatpat ni Apolinario ang pila ka mga rason kun ngaman ‘unfit’ si Monares para sa amo nga posisyon.
Kasunod sini, gindayaw ni Board Member Jonathan Sonny Besa si Apolinario bangud sa kaisog sini nga mapabutyag ang iya nga ‘concern’ para sa gobernador kag sa gobyerno-probinsiyal.
Suno kay Besa nga nabatyagan sini ang paghangawa ni Apolinario indi lamang kay Contreras kundi sa bilog nga probinsiya sang Capiz.
Dalayawon man suno kay Board Member Ricky Martin ang ‘courage’ kag determinasyon ni Apolinario sa paghatag sang iya personal nga sentimyento pag-abot sa amo nga isyu sa pihak nga kapin sa pito ka bulan pa lamang ini sumugod sang nangin miyembro sang konseho sang gobyerno-probinsiyal.
Nagpabutyag naman sang suporta si Martin sa mga ginpalayag nga sentimyento ni Apolinario sa iya ginbasa nga open letter.
