Ginabulubanta nga nagdangat sa 6 ka barangay ang nabalhag nga ginbaha sa syudad sang Roxas tuga sang pag-inulan nga dala sang bagyo Kristine.
Sa interview sang Bombo Roxas kay Aljessie C. Alivio, LDRRMO II, ang mga Barangay nga ginbaha amo ang Liong, Adlawan, Loctugan, Bago kag Bolo ang nabalhag nga ginbahaan ang humayan ukon rice field.
Yara naman sa ginabulubanta nga 8 tubtob 15 ka mga pamilya ang nabalhag nga naapektuhan sang pagbilinaha nga kun sa diin nag-evacuate ini sa pila ka mga evacuation centers sa tagsa nila ka mga barangay.
Dugang pa ni Alivio, ang iban nagpauli na sa tagsa nila ka mga puluy-an apang may ara man ka mga pamilya ang mas ginpili nga magtinir sa evacuation center para masiguro ang ila kaluwasan.
Samtang, wala naman sang may na-monitoran nga may nawasak nga mga kabalayan sa kada barangay sang syudad kag wala man sang may nabalhag nga napilasan bangud sa nasambit nga bagyo.
Sa karon, padayon pa ang ginahiwat nga monitoring sang LDRRMO sa bilog nga syudad kag padayon man ang mga ini nga nagahatag sang updates kag pila ka mga impormasyon sa ila social media.
Panugyan ni Alivio sa mga pumuluyo, ginapangabay sini nga kun may mga magluntad nga insidente sa mga kabarangayan sa syudad, gilayon nga ipalab-ot sa mga otoridad agud mahatagan sang nagakaigo nga pag-respondde.
