ROXAS CITY – Nagpalab-ot sang ila reklamo ang pila ka residente sang Barangay Lawaan, Roxas City sa Bombo Radyo News Team natuhoy sa indi patas nga pagpanagtag sang food packs, bugas kag listahanay sang mga benepisyaryo sang Social Amelioration Program (SAP) sang Department of Social Welfare and Development (DSWD).
Dismayado si Manang Inday sang Sitio Proper sang nasambit nga barangay matapos wala siya makabaton sang tunga sa sako nga bugas gikan sa gobyerno sang siyudad apisar nga tumandok gid ini sang nasambit nga barangay.
Ginpahayag sini nga wala man siya malakip sa listahan sang makabaton sang SAP gikan sa DSWD bangud gid lamang nagatrabaho ini sa luwas sang pungsod kag nakapauli sa Capiz para magbakasyon kag isa ka manunudlo ang iya anak.
Nagpanawagan naman si Tatay Jose sa gobernador sang probinsiya nga kuntani paghimo man sang aksiyon agud mabuligan ang mga pumuluyo.
Suno diri nga madamo na ang ginagutom sa ila barangay bangud isa ka beses lamang sila nakabaton sang food packs nga gikan sa isa ka konsehal.
Ginpahayag sini nga bisan pa nalakip sila sa listahan sang mga makabaton sang mga bulig gikan sa gobyerno, ang ila mismo nga mga Barangay Health Workers (BHW’s) kag barangay officials ang nagapili sang ila hatagan sang bulig gikan sa gobyerno kag ginapasulabi ang ila mga kakilala kag pamilya.
Nagapanindugan naman ang pila ka residente sang Sitio Jail sang nasambit nga barangay nga may pinilian ang ila mga opisyales sa pagpanghatag sang bulig sa mga residente.
Suno kay Tatay Jose, isa ka construction worker, ginpasalig lamang siya nga igalakip ang iya pangalan sa listahan apang wala sa gihapon sang may nagatupa nga bulig sa ila.
Una lamang ini nga nakabaton sang food packs apang wala siya malakip sa mahatagan sang tunga sa sako nga bugas gikan sa gobyerno sang siyudad.
Suno diri nga wala man sang kasiguraduhan kun malakip siya sa mga benepisyaryo sang Social Amelioration Program (SAP) sang Department of Social Welfare and Development (DSWD).
Nagalain naman ang buot sang isa ka senior citizen sa Kilometer 3, sa nasambit nga barangay bangud tatlo sila ka mga senior citizen sa ila balay apang wala gid sila sang may ginapaabot nga social pension.
Suno diri nga tatlo lamang sila sa ila balay kaupod ang iya tiayon kag utod gani wala sila sa karon sang iban nga ginasaligan kag nagalaom nga makaambit sang bulig gikan sa gobyerno ilabi na sa karon nga tion sang krisis.
