ROXAS CITY – Wala sang halos customer nga nagapadulong sa may bahin sang Rizal street, sakup sang Barangay VII, Roxas City, matapos nga ginguba ang porsyon sang ila dalan kag ginpabay-an.
Ini ang ginpabutyag nga reklamo sang isa ka tag-iya sang nagaparenta nga edipisyo nga si Edwin Billedo, sang napakig-angutan sang Bombo Radyo.
Suno diri, nagareklamo na ang nagarenta sa iya building nga perde ang ila negosyo bangud sang ginguba nga karsada nga kapin tatlo na ka bulan subong nga Agosto.
Indi man sini maintindihan kun ano ang ginahulat sang contractor nga ba-se sa iya pagpangusisa pangayaw sa syudad sang Roxas, agud kay-uhon ang ginbuho-buhoan nila nga karsada kag wala na ginsapak pagkatapos.
Bangud sini, nagalaum si Billedo nga maaksyunan ini sang natungdan agud indi maapektuhan ang ila negosyo kag ang mga nagatrabaho sa lugar.
