ROXAS CITY – Nagpalab-ot sang reklamo ang pila ka mga vendor sa sulod sang Ivisan Public Market bangud masami sila ginakawatan, sang indi mapanabat sa layi nga mga suspetsado.
Sa exclusive interview sang Bombo Radyo kay Ronnie Pimentel, RTW vendor, ginpahayag sini nga kun sumahon mas o menus P48k na ang balor sang nataban sang mga kawatan sa ila puwesto nga mag-utod, sumugod sang una nga ginsulod ang merkado subong lamang nga tuig.
Ginpahayag man sini nga halos kada semana, nagapangawat ang ginatudlo grupo sang menor de edad nga mga suspek, pinaagi sa pag-agi sa atop sang merkado.
Makabig man nga pinakadako nga pagpangawat ang natabo subong nga semana kun sa diin kapin 51 ka overrun t-shirts, pila ka bilog nga pares sang sapatos ang nadala sang suspek, kun sa diin, sa sobra ka pagdinali sang makawat, bangi-an nga pares sang sapatos ang ila nabitbit.
Ginpalab-ot naman nila ini sa mga kapulisan, matapos nga isa ka 17-anyos nga lalaki nga isa sa mga suspek ang natigayon nga madakpan sa ibabaw sang atop sang merkado apang suno sa mga kapulisan sa Ivisan nga indi mahimo mapreso ang nadakpan nga suspek bangud menor de edad ini, sa baylo, ginturn-over nalang ini sa DSWD.
Sa karon, nagapanawagan ang mga vendors sa ila LGU nga mahatagan sang igtalupangod ang ila problema bangud dako ini nga kapiyerdehan sa ila palangabuhianan.
