ROXAS CITY – Indi kumbinsido ang pila ka vendor sang panginhason sa Teodoro Arcenas Trade Center (TATC) nga may presensiya sang Pyrodinium bahamense, isa ka organismo nga nagadala sang Paralytic Shellfish Poisoning (PSP) ukon Red tide sa kalalawran nga sakop sang syudad sang Roxas.
Ini bangud padayon sila sa pagbaligya kag ginsiling nga ang kadagatan sang Pilar kag President Roxas lamang ang nagpositibo sa red tide.
Sa interview sang Bombo Radyo kay Emmy Mijares kag Corazon Villasorca, lunsay taga-Barangay Culajao kag pila sa nagpangisog nga magbaligya sang panginhason sa TATC subong nga adlaw, suno sa ila nga ginapamatyagan nila ang baligyaanay, kag magauntat man kun pagabawalan na, apang madamo man suno sa ila ang nagbakal sa ilabi na sa tahong.
Ginapamangkot lang sila sang manugbakal kun sa diin nagakuha sang baligya nga panginhason kag nagasiling ang vendor nga diri lang sa syudad sang Roxas kag indi sa Pilar kag President Roxas.
Matandaan nga kahapon nga adlaw sang Biyernes, nagpaguwa sang abiso sa publiko ang provincial government kun sa diin ginapalikaw ang pumuluyo nga magharvest, magbakal ukon magkaon sang tanan nga sahi sang panginhason nga nagikan sa kalalawran sang President Roxas, Pilar, Roxas City kag Ivisan bangud sa presensiya sang nasambit nga organismo sandig sa ginpatigayon nga water sample sang Provincial Agriculturist Office.
Samtang ginahulat ang opisyal nga kumpirmasyon sang shellfish meat samples nga ginpadala sa BFAR-Central laboratory sa Quezon City, kun bala ang ginaalegar food poisoning nga nabalhag sa banwa sang Pilar ang may kaangtanan sa pagkapositibo sa red tide sang ila kadagatan.
